05
май
2023
Ұшқан ұя - алтын мектебім❤️
Менің мектеп бітіргеніме 14 жыл өтсе де, мектебіммен байланысым ешқашан ажыраған емес. Білім берген ұстаздарымнан бөлек, кітапханашы, еден жуушыларды, зав.хоз, медбикені де өте жақсы танимын. Олардың аты-жөндерін, түрлерін ұмытқан емеспін. Математик Төлеубай Ыдырысұлы Аманов атындағы мектептің 100 жылдық тарихы бар. Әрі Семейде ашылған алғашқы қазақ орта мектептерінің бірі. Бұл білім ордасында мен 11 жыл бойы білім алдым. 2009 жылы ҰБТ-да қаладағы ең жоғары ұпайды жинап, “алтын белгі” иегері атанып, мектеп атын Республика көлемінде асқақтатқаным жасырын емес. Білім берген ұстаздарыма мың алғыс айтамын, әрқашан мақтанып жүремін. Бүгін мектебімнің оқушыларына лекция оқып, олармен жылы жүздесу өткіздім. 10 жылдықта сыныптастар болып, марқұм Тұрсынай Әшірбайқызына (бізге қазақ тілі мен қазақ әдебиеті пәнінен сабақ берген) арнайы кабинет ашып, жөндеу жұмыстарын жасап бердік. 2017 жылдан бері мен өз атымнан үлгілі, озат оқушыларға жасырын түрде шәкіртақы беріп келдім. Тек 2020 жылы директор “олай болмайды, атаулы шәкіртақы болсын, өзгелерге үлгі болсын” деген соң барып келіскен едім. Осылайша, дәстүрге айналған шәкіртақы биыл тағы да өз жалғасын табады. Бұл оқушыларға бірінші кезекте үлкен мотивация деп білемін. Білімге құштар ұрпақ қатары көбейсін. Ұстазын ұлықтаған ұлт қатарынан болайық. Ps: Баласының қандай дәрежесі болса да, ата-ана үшін бала - бала болып қала береді. Сол секілді өз ұстаздарыма олар үшін бірінші кезекте оқушымын. Ыстық ықыластарыңызға мың алғыс.
